René Heyvaert

_René Heyvaert. Mail Art 1964—1984

_ materia

Arte contemporáneo

_ especialidad

Arte postal

René Heyvaert
Mail Art 1964—1984

Este libro presenta un estudo e unha selección significativa da arte postal do artista belga René Heyvaert (1929-1984). A súa actividade de Mail Art está profundamente ligada tanto a un contexto artístico que revindica unha arte ancorada na realidade vivida, cotiá e social, como ás súas circunstancias vitais que alimentan a súa vocación epistolar así como toda a súa creación artística.

_ el origen

Este libro retoma parte dos resultados da tese doutoral de Anne Heyvaert (filla do artista): A arte postal de René Heyvaert: unha concepción mínima e cotiá da arte, defendida na Universidade de Vigo, Facultade de Belas Artes, en 2010. Esta investigación, dirixida pola profesora Elena Lapeña, intégrase nas liñas do grupo dx5 relacionadas cunha reflexión contorna á modernidade e as súas marxes, a produción de obra na fronteira, espazos e modelos de difusión da arte… A investigación permitiu iniciar un inventario cronolóxico, destacando diferentes series coherentes sempre en relación coas súas experiencias artísticas do momento. O inventario foi realizado coa colaboración de Lightmachine Agency, Gante, e completado desde entón, entre outros, polos achados de Lodovico Corsini da galería CLEARING, Bruxelas. A publicación do libro, coeditado pola editorial belga Triangle Books Edition (de referencia internacional en libros de arte contemporánea), coincidindo coas exposicións monográficas de René Heyvaert na Galería Clearing, Bruxelas, 11/11/2018-16/02/2019, e no CGAC, Santiago de Compostela, 08/03-16/0672019. En ambas as exposicións destacouse a importancia destas obras postais dentro do corpus artístico xeneral do artista.

O libro presenta 108 tarxetas e obxectos postais, case a metade dos 260 rexistrados ata o de agora, enviados entre 1964 e 1984 a uns 40 destinatarios diferentes (amigos, familia e artistas). As obras están reproducidas a escala 1/1 polas súas dúas caras (recto e verso das páxinas) e ordenadas por datas.

“…espero que recibas o coitelo de cociña que che envíe onte. Que a aduana española non o confisque (…). dime pronto se o recibes ou non, teño moita curiosidade. xa que ademais penso que é o obxecto máis belo que xamais che enviei.”

René Heyvaert: Carta a Anne, febreiro de 1982

A maioría da súa produción postal, enviada sen sobre e case sempre sen texto, respecta os tamaños e formatos postais e integra na súa estética os elementos propios do sistema (datos, selos, cuños). Pero en ocasións divírtese en provocar o sistema con materiais e recortes extremos, a utilización de elementos cotiáns e íntimos, ou enviando algúns obxectos de maior tamaño, como os que se poden ver sobre o poster adxunto ao libro. A publicación inclúe un texto, motivado polo vínculo persoal e emocional da autora, e sustentado sobre a exploración conceptual, formal e perceptiva da particular obra postal do artista. Analízase como as súas tarxetas e obxectos son froito dunhas experiencias artísticas propias do seu tempo, pero tamén da súa formación inicial como arquitecto; todas as súas obras manteñen sempre unha relación material e espacial coa súa contorna vivida. Obsérvase tamén como o seu illamento, consecuencia dunha saúde moi delicada, motivou o envío por correo, cada vez máis frecuente, destas pequenas obras. René Heyvaert seduce e conquista aos seus destinatarios coas súas orixinais obras para a vista e a man, á vez que cuestiona e desafía a natureza da arte e o seu lugar na sociedade.

René Heyvaert pretende implicar os seus destinatarios na súa existencia e na súa arte, unha “arte verdadeira” tal como el definíao; unha arte ancorada na vida diaria.

Libro completo >>>

ficha do libro >>>