Grupo – DX5

Desde a súa creación en 2004, o grupo de investigación dx5 digital & graphic art_research especializouse na gráfica contemporánea de campo expandido. Durante os primeiros anos e baixo un título, talvez demasiado xenérico, —”Aplicacións das novas tecnoloxías ao gravado e estampaxe con fins artísticos”— pero movidos pola idea multidisciplinaria da obra de arte gráfica nos nosos días, o noso traballo de investigación centrouse na procura e na achega de instrumentos e de estratexias novas neste campo, adaptando e optimizando sistemas e procesos contemporáneos de maquinarias industriais (como fotopolímeros, láseres, fresadoras ou plotters), que permitan definir contornas novas, solucionar inconsistencias herdadas de prácticas anteriores e afondar no que significa a obra de arte múltiple neste terceiro milenio.

Nos últimos anos, e coa incorporación de novas persoas investigadoras, pre e posdoutorais e persoal docente investigador (PDI), as nosas liñas e proxectos multiplicáronse, abríndonos a novos campos no universo da gráfica contemporánea, que abranguen temas tan dispares como a complexidade e a sostibilidade na arte e no deseño contemporáneos, a redefinición e a evolución do libro de artista como medio, soporte e idea creativa nunha contorna cada día máis dixital, ou as conexións do cómic e da animación con outras manifestacións artísticas do noso tempo. Interésanos o que acontece na fronteira. O campo expandido das distintas disciplinas que abren novos percorridos para chegar a novos territorios.

Liñas de investigación

Durante estes quince anos, unha tripla perspectiva —teórico-conceptual, artístico-práctica e científico-técnica—

articula e define todos os nosos proxectos e liñas de investigación arredor da gráfica contemporánea.

Práctica artística de campo expandido. Arte múltiple contemporánea.

Liña teórico-conceptual

• Reflexión conceptual e filosófica da obra de arte múltiple no século XXI. Complexidade e sostibilidade.

• Socioloxía do consumo da obra múltiple. Arte, empresa e comunicación.

• O concepto de seriación e as novas tecnoloxías.

• A matriz intanxible. O concepto de autoría no século XXI. Redes.

• Macrocosmos e microcosmos. Sistemas relacionais.

• Estratexias e aproximacións para un deseño consciente.

• Pintura de campo expandido. Transformacións, aperturas e rupturas na práctica pictórica do século XXI.

• A construción da identidade: xénero, tópicos e arquetipos.

Liña científico-técnica

• Aplicación das novas tecnoloxías industriais á arte contemporánea.

• Deseño, desenvolvemento e modificación de software e hardware con fins artísticos.

• Sistemas de sostibilidade aplicados á arte contemporánea.

• Sistemas non tóxicos de impresión: tecnoloxía de impresión piezoélectrica e estampa inxectada. Tecnoloxía láser aplicada á gráfica de arte contemporánea. Da pegada incisa ao gravado con luz; electricidade e xeración de imaxes.

• Gráficas interactivas para unha nova estampa dixital. Realidade aumentada.

• Interaccións entre pintura, tecnoloxía dixital e novos medios.

Liña artístico-práctica

• O espazo da gráfica contemporánea: teoría e praxe da gráfica dixital, input-output.

• A pegada do inmaterial. Relación entre o visible e o invisible.

• O espazo da serie: seriación e estampa. Repetición e transformación. Trasgredindo cuestións prácticas e formais da edición. A edición expandida.

• O espazo do libro: o libro de artista como proxecto artístico para a transmisión de pensamento.

• Hiperlibro. A páxina mutante. A páxina sensible. Historias e imaxes rizomáticas.

• O espazo do cómic: estudos transdisciplinarios de cómic (ETC).

• O espazo do deseño: produción de obra e investigación na fronteira. A modernidade e as súas marxes: interrelacións entre arte, deseño e moda.

• Estudos transdisciplinares téxtiles.

• Deseño consciente para o século xxi. Intervencións no deseño gráfico e editorial.