"The Print Factory II" é o segundo proxecto dentro da liña editorial e de investigación titulada The print factory, nacida coa vontade de cumprir a vocación de transferencia do binomio investigación-docencia no ámbito universitario por parte do grupo dx5 da Facultade de Belas Artes de Pontevedra. O obxectivo do proxecto é documentar como as principais liñas de investigación do grupo, centradas na fusión de novas tecnoloxías e técnicas gráficas tradicionais, así como na reflexión sobre a gráfica de campo expandido, desembocaron nas propostas artísticas do estudantado das diferentes materias vinculadas á área de coñecemento da arte gráfica. Coa creación da liña editorial The print factory preténdese darlles visibilidade con carácter trianual aos traballos máis destacados realizados por estudantes que cursaron materias relacionadas coa práctica da gráfica contemporánea. O proxecto incide no valor da comunicación e da difusión social da documentación recollida e na intención de conxugar a filosofía de transgresión técnica e conceptual do grupo dx5 coa aplicación dunha metodoloxía creativa no proceso de investigación da disciplina da arte gráfica.