_O múltiple que ocupa o espazo
_ materia
_ especialidad
_o multiple que ocupa o espazo:
O múltiple que ocupa o espazo é unha publicación que recolle e expande os contidos do VIII Foro Internacional de Creación na Fronteira, celebrado en Pontevedra en maio do 2024. A través de textos inéditos, documentación visual e ensaios curatoriais, o libro ofrece unha visión interdisciplinar sobre a gráfica contemporánea como práctica expandida, instalativa e transdisciplinar. Reúne as cinco ramificacións do evento —Sinerxias, Simbiose, Xerminal, Interferencias e Resonancias— e inclúe capítulos introdutorios e conclusivos que abren novas liñas de investigación sobre a arte múltiple e a súa relación co espazo.
_orixe
Este libro plasma o proxecto «O múltiple que ocupa o espazo», desenvolvido en formato multisede na cidade de Pontevedra no marco do VIII Foro Internacional de Creación na Fronteira. A iniciativa reuniu exposicións, conferencias e intervencións públicas en colaboración con numerosas entidades como a Fundación RAC, o Concello de Pontevedra, VacíoCero, a Universidade de Vigo e outras institucións culturais e académicas. Baixo o selo editorial Sendemà, a publicación recolle os contidos xerados durante o foro e articúlaos nun volume que combina documentación visual, textos curatoriais e capítulos inéditos. A súa estrutura reflicte o carácter interdisciplinar do proxecto, e propón unha lectura expandida da gráfica contemporánea como práctica plural e complexa.
_enfoque
Esta publicación aborda a gráfica contemporánea desde unha perspectiva transdisciplinar, entendendo a arte múltiple como un campo expandido que se desprega no espazo e o transforma. O volume sitúase na intersección entre práctica artística, investigación técnica e pensamento crítico, e propón unha lectura plural dos procesos gráficos actuais, afastados dos seus soportes tradicionais e abertos a novas metodoloxías de produción e exhibición. A gráfica preséntase como unha disciplina capaz de habitar o espazo, interferilo e subvertelo desde a concepción da matriz non como elemento de reprodución, senón como produción en si mesma. O enfoque do libro articúlase a través de textos curatoriais, ensaios teóricos e documentación visual que permiten comprender a evolución do medio gráfico en diálogo con outras prácticas contemporáneas.
“Partindo dunha selección heteroxénea de artistas autóctonos, nacionais e internacionais, o fío condutor do proxecto proporciona unha visión interdisciplinar da gráfica, ampliando o entendemento dun medio tradicionalmente asociado a metodoloxías e formas de exhibición limitantes. O paradigma do gravado en papel atrapado entre cristais e marcos de madeira deu paso a novas formas de expresión que contribuíron a romper moldes e estereotipos.”
Susana Cendán
_sobre o contido
O libro estrutúrase en sete apartados que percorren as distintas fases do proxecto, desde o seu plantexamento conceptual ata as súas proxeccións futuras. Inclúe introducións curatoriais, ensaios teóricos e documentación visual das exposicións, conferencias e intervencións realizadas en Pontevedra. Cada capítulo abre unha liña de reflexión sobre a gráfica como práctica expandida, con especial atención á súa dimensión espacial, instalativa e pública.
Participan máis de sesenta autores e autoras, entre artistas, investigadoras e axentes culturais, baixo a edición de Ana Soler e o selo editorial Sendemà. O volume reúne voces diversas que contribúen a pensar a arte múltiple desde a heteroxeneidade dos seus procesos e formatos.
A publicación está dispoñible para a súa descarga gratuita en versión dixital open-access a través de Investigo, o repositorio institucional da Universidade de Vigo