Baixo o título de The Print Factory e desde a formación do grupo de investigación, veuse compilando unha selección das obras gráficas máis interesantes realizadas por alumnado de segundo e de terceiro ciclo da Facultade de Belas Artes.
O obxectivo deste gabinete de estampa contemporánea é documentar como a principal liña do grupo de investigación dx5, centrada na fusión de novas tecnoloxías e técnicas gráficas tradicionais, materializouse na transferencia destes resultados a través da súa aplicación na docencia.
Este feito está a xerar que o alumnado en contacto co equipo docente e investigador do dx5 adquira metodoloxías e estratexias técnicas e creativas diferenciadoras respecto doutras universidades e centros de ensino de arte gráfica españois, avaladas pola concorrencia en concursos competitivos especializados.

Conceptos:
– Novas metodoloxías didácticas
– Aplicación da metodoloxía científica-investigadora á docencia universitaria.
– Catalogación e difusión de obra transfronteiriza (arte e tecnoloxía) da gráfica contemporánea
– Redefinición do binomio investigación docencia.

Obxectivo:
O obxectivo do proxecto é recoller e mostrar os resultados obtidos tanto no ámbito técnico coma creativo, froito da aplicación da investigación á docencia no campo da gráfica na Facultade de Belas Artes da Universidade de Vigo. Polo que «The Print Factory» nace como compilación co espírito de servir como plataforma de difusión e potenciación para todos estes proxectos de obra gráfica, ata agora limitados en exclusiva ao reducido ámbito do taller de gráfica da Facultade de Belas Artes de Pontevedra.
Este proxecto de investigación incide profundamente nun valor de comunicación social, e na propia publicitación do labor investigador e didáctico do grupo dx5, a través de «The Print Factory»: un novo proxecto de difusión e de innovación educativa no campo da gráfica contemporánea.
A publicación en publicacións temáticas das mellores estampas, incluídas neste arquivo, permite exportar e difundir este labor no ámbito internacional. Á vez que se documenta esta actividade coa vontade de repetirse con carácter trienal, de forma que esta dinámica se perpetúe a través da retroalimentación entre as brillantes promocións vindeiras.
Ata a data, e como resultado directo deste proxecto, viron a luz dúas publicacións do proxecto editorial «Print Factory»: «The Print factory 1» e «The Print factory II». O espazo do libro está centrado no libro de artista.